SANEPA

Inggih menika ukara pepindhan ingkang ajeg dhapukanipun, kadadosan saking tembung watak sinambung kaliyan tembung aran. Biasanipun, gandhenganipun tembung watak kaliyan tembung aran menika wau nggadhahi teges enggal.

            Tuladha :

            Anteng kitiran             = Polahe, rongeh banget / ora bisa meneng

            Tegesipun, sakanteng-antengipun kitiran mesthi wonten obahipun. Biasanipun dipungathukaken kaliyan tingkahipun bocah ingkang boten saged mendel, obah kemawon. Menawi dipuntrepaken wonten ing ukara, kados makaten :

            “Bocah kok anteng kitiran, wiwit mau ana wae sing diutheg”

            Dhuwur kencur           = Dedege cendhek

            Tegesipun, kencur menika rak panggenanipun tumempek kaliyan lemah. Jarak antawisipun lemah kaliyan kencur menika namung sekedhik (boten dhuwur). Kados wonten ing ukara ing ngandhap menika :

“Calone Eko kae, dhuwur kencur”

            Legi bratawali             = Rasane pait banget

            Tegesipun, raosipun bratawali menika pait. Boten wonten bratawali menika raosipun legi. Dados saklegi-leginipun bratawali tetep kemawon raosipun pait. Saged dipunpirsani ing ukara menika :

            “Pil mau rasane legi bratawali”

            Kuru semangka           = Bobote lemu

            Tegesipun, semangka menika bobotipun abot, antep. Dados sakuru-kurunipun semangka tetep abot, tetep antep. Tuladha ing ukara kados makaten :

            “Suwe ora tau ketemu, nalika ketemu kok awake dadi kuru semangka”

            Abot kapuk                 = bobote entheng

            Tegesipun, kapuk menika entheng. Sakathah-kathahipun kapuk menika bobotipun entheng. Menawi dipuntrapaken wonten ing ukara, kados makaten :

            “Anggone nyangking kok sajak abot kapuk, kamangka dheweke nyangking kranjang blanjan”