TULADHA PANYANDRA

Panganten Putri Kalenggahaken ing Sasana Rinengga

(sinubagya ungeling Gendhing Ketawang Puspawarna Slendro Manyura)

             Binarung swaraning pradangga munya angrangin, ana ganda arum angambar angebeki jroning sasana pawiwahan, nulya kawuryan ana teja angenguwung mawa praba, tuhu punika tejane panganten putri ingkang binayangkare mijil saking tepas wangi, kinanthi manjing sasana rinengga.

Sampating busana ingkang angemba busananing prameswari nata, tinon saking mandrawa abyor mompyor pating galebyar pating calorot, katempuk ing pandam kurung ingkang angrenggani, lamun cinandra kadya kilat asesiring.

             Amucang kanginan denira lumaksana panganten putri, membat madya lumenggang ing warih. Meloking wadana sumunu agilar-gilar kadya kencana binabar, sunaring netra andamar kanginan.

            Wewenging pranaja singset kapathet ing ageman, pindha cengkir gadhing piningit, yayah anjebol-njebolna mekak madya ingkang minangka setubandaning sarira.

           Kicating pada katon pating galebyar dening rerengganing canela ingkang tinaretes ing sesotya nawaretna, ginantha ing wardaya candrane kaya wredhu angga sasra lumaku ing wanci dalu.

Prapteng madyaning sasana pawiwahan kagyat kagora kang apindha sitaresmi inggih musthikaning pawiwahan, dene uninga sanggyaning para tamu kakung sumawana putri, wus kebak ber ambalabar angebekti jroning pawiwahan, nganti kaya andhoyong-ndhoyongna pancake sujining pandhapi agung bale winangun. Marwa tumanduking raos ingkang dahat tumanem ing kalbu, yayah linobong jroning wardaya, kelem karoban ing memanis, ingkang tuhu tan kawawa cinitra ing ukara.

            Prapteng unggyan ingkang tinuju dening panganthining panganten putri ingkang pinaragan dening Ibu Kartini sumawana Ibu Suharsi, musthikaning pawiwahan gya kinanthi kalenggahaken ing sasana pinajang, nagrantu laksitaning adicara ingkang wus rinantam.

                  Nalika samana kawistara sri pinangantyan wus lenggah anggana raras.

(sasampunipun panganten putri lenggah, gangsa kasuwuk).

Kapethik saking : Tuntunan Kagem Para Panatacara tuwin Pamedhar Sabda

Dening : Rama Sudi Yatmana