#GURIT# Gurit Pait

Iki gurit

Geguritane ati kang lagi njerit

Marga karangkeng ing donya kang legi

Nanging legi bratawali

Gurit pait iki

Kanggo kowe, wong kang pelit

Pelit ing ati,

Wuta ing tata,

Ora nggape ing liyan

Dakesemi, ethok-ethok ora ngerti

Daktakoni, wangsulanmu ora mranani

Dakparani, lekas-lekas nglungani

Arep daksalami, jarene lagi alergi

Apa salahku?

Apa marga sekolahku sing SD wae ora butus?

Ora kaya panjenengan sing titele insyinyur

Apa marga gaweyanku mung buruh?

Dene panjenengan direktur

Apa marga saben dinane aku mung mlaku?

Dene panjenengan wae duwe mobil cacah telu

Embuh…