TULADHA TAMPI PASRAH PANGANTEN KAKUNG

Nuwun,

Winantu ing kawilujengan.

Sinartan sinukartaning panambrama.

Ibu miwah Bapak R. Kusna Wijaya, S.H.,

dalah para putri putra, dalasan sanggyaning kulawarga, punapa dene para rawuh.

Nuwun, tumanggap pangandikanipun Bapak Drs. Iman Sarjana, ing anyulihi Ibu tuwin Bapak R. Kusna Wijaya, S.H., amasrahaken panganten kakung, kaparenga kula matur, minangka sesulihipun Ibu saha Bapak R. M. Sukarja Wiryasuputra, kula kadhawuhan tampi pasrah panganten kakung.

Pramila, kaparenga amratelakaken bilih ing samangke wanci tabuh 10.00, panganten kakung kula tampi kanthi sae, andadosaken suka bingahing manah; saha sumangga sami muji syukur konjuk ing Hyang Murbeng Gesang.

Salajengipun panganten kakung badhe sarimbit kaliyan panganten putri Asih Sulastri, dumungkap upacara candhakipun.

Kula nyadhong pangaksami mbokbilih wonten kakirangan saha kaladuking panampi.

Nuwun.

Kapethik saking : Tuntunan Kagem Para Panatacara Tuwin Pamedhar Sabda

Anggitanipun : Rama Sudi Yatmana