GAMBUH

Ing ngadhap menika salah satunggaling cakepan tembang Gambuh ingkang kapethik saking Wedharaga anggitanipun R. Ng. Ranggawarsita.

Mangkene patrapipun

Wiwit anem amendenga laku

Ngengurangi papan turu sawatawis

Amemekak hawa napsu

Dhasarana andhap asor

Akanthi awas emut

Aja tinggal weweka ing kalbu

Mituhua wewarah kang mikolehi

Dentaberi anggeguru

Aja isin atetakon

Wong amarsudi kawruh

Tetirona ing reh kang rahayu

Aja kesed sungkanan sabarang kardi

Sakadare angengimpun

Nimpeni kagunaning wong

Tinimbang lan anganggur

Baya becik ipil-ipil kawruh

Angger datan ewan panasten sayekti

Kawignyane wuwuh-wuwuh

Wekasan kasub kinaot

Lamun wus sarwa putus

Kapinteran sinimpen ing pungkur

Bodhonira katokna ing ngrsa yekti

Gampang traping tindak tanduk

Amawas pambekaning wong.