#GURIT# Desember kaping 20

Wus ping rong puluh aku ketemu sliramu

Sasi pungkasaning taun

Nostalgia marang kadadeyan endah kang wiwit lumuntur

Dakantu-antu kadadeyan endah liyane kang bakal kawetu

           

Kairing donga ing sasi iki

Mugya ingsun dadi wanodya kang luwih becik

Myang mugya mbesuk isih bisa pinanggih

Kanthi kenangan ing sasi iki kang manis

#GURIT# Kacu

Apa ta gunane kacu?

Dakkira kanggo ngulap tumetesing eluh

Liyane?

Ngulap samubarang kang butuh diresikke

Apa maneh?

Wangsulane, akeh

Ngertiya ngger

Tuladhanen kacu kuwi

Lila dadi reged kanggo karesikane liyan

Lila kurban kanggo wigatine liyan

#GURIT# Sega Aking

Sega aking, sega garing

Jarene segane wong kang nasibe kurang mranani

Aja ngina dupeh sega aking

Kanggone, sega aking iki gedhe ing andil

Panyambunge urip nalika ora kuwat

Ora kuwat nyangga aboting urip

Nalika kudu nggudag seabreging kabutuhan

Kang ora rampung-rampung dituruti

#GURIT# Cah Ayu

Dhuh, cah ayu

Wong wadon kang endah ing busana

Tutur kang tumata

Pakarti kang utama

Uga rupa kaya Sinta

Esemu kang manis

Sapa sing milik?

Begjane priya kang bisa nyandhing sira

Welingku tetepa kalem tetepa adhap

#GURIT# Lumunturing Budaya

Eman-eman temen

Bocah bagus padha tindhikan

Sing wadon ora isin ngumbar aurat

Rambute padha semiran

Aklambi bolong-bolong

Kathokan suwek-suwekan

Le, Ndhug

Oleh gandrung nanging aja lali marang budaya kang luwih adi luhung

Oleh gandrung nanging aja kedlurung

Negara iki ana ing tanganmu

Kowe sekabehane ing pundhakmu

Iku mikul gedhe pengareping bangsa